星怡 (已結業)

同小朋友睇完戲，見到商場入面竟然有咖央多士同埋蝦面，仲有我同小朋友都好鍾意食嘅魚露煮蜆，價錢合理，所以都唔理咁多，即管入去一試，入到餐廳見到裝修簡單，不過牆上面有好多關於星馬嘅靚畫，感覺都幾特別。魚露煮大蜆，每粒蜆都脹卜卜，好鮮甜好美味，醬汁酸酸辣辣好開胃，一碟都有10幾隻，食得好滿足。蝦麵湯底濃郁，而且好大碗，除咗有兩隻大蝦之外，仲有豬骨，小朋友鍾意米粉同油面一齊食，小朋友覺得好特別，而我真心覺得個蝦湯好好味，食完成個面忍唔住飲晒個湯。最後我哋用咖央多士同水果茶，當係甜品，咖央多士好大份好厚，牛油超多，見到已經覺得好吸引，食入口好滿足，外面脆多士，入面牛油凍凍地，真係好好味，小朋友食到唔停口，喺呢個商場以呢個價錢食到一餐咁高質嘅星加坡菜，都算係性價比高。