瀛鮮-日泰韓中潮川風味放題 (已結業)

今日一大班人嚟慶祝過咗嘅聖誕節，雖然過咗，但係有聚頭嘅機會其實已經好好，應珍惜。一嚟到我哋就叫咗個花膠雞窩，估唔到個花膠雞窩真係非常之足料，入邊有好多片花膠，仲有蜆，半隻雞。佢煮出嚟嘅湯味道都好濃，唔會剩係得味精嘅味道，我哋好快就已經將啲湯飲晒。之後就轉左韓式燒烤，材料嘅選擇都幾多，可以燒活生生嘅鮑魚啦，鮮蝦。甚至韓牛，豬頸肉第都有提供。我就梗係叫咗我最鍾意食嘅漢堡扒啦，好多朋友都話有冇搞錯啊食漢堡扒，但係識食嘅一定係食漢堡扒啦，你明嘅。其實本身個鍋，可以打埋邊爐，但係佢嘅食物實在太豐富，打得邊爐，韓燒埋其實都無位再食其他。但係都建議食埋佢啲日本嘅小食，例如炸芝士年糕，炸香芋丸，鮮蝦天婦羅， 南瓜天婦羅等等，都係非食不可嘅食物。仲有嘅就係甜品，佢嘅甜品會有紅豆嘅雪條，日式雪米糍，同埋好多杯裝嘅雪糕記住食埋先走啊。