朋友介紹依間位置稍為偏遠嘅餐廳，位於浸大側邊，雖然地點唔多就腳加上係平日，但仍然都有好多食客捧場，幫襯嘅都唔少都係老師學生。
我地叫左個兩份set dinner，已經包左餐湯、主食、餐飲同埋甜品。
紅湯 vs 白湯
紅湯係羅宋湯，正常味道，冇咩特別；但白湯都幾特別，係「紅菜頭紅蘋果西米忌廉湯」我覺得都幾fusion，有加西米、蘋果，酸酸甜甜，有啲似食甜品，個感覺幾特別。
主食 - 香草薄荷醬焗羊仔排
羊仔排要咗七成熟，切出嚟冇血水啱啱好、又冇羊騷味，肥膏都唔多，好吃！
主食 - 法式鵝肝牛柳配炸薯
鵝肝配佢餐包附送個塊脆多士一流！令我諗起旋轉餐廳上面令我難以忘懷嘅鵝肝，依塊冇咁肥同油，必食！
牛柳偏瘦，都有肉味，普普通通。
甜品 - 焗南瓜布甸伴吉士薑汁
講起布甸，我以為布甸係軟林林一碗類似啫喱樣嘅東東🍮。到上甜品時，係兩個黃色版貌似係心太軟嘅野，我都有啲疑惑係唔係上錯甜品？布甸剛剛焗起，外面香香脆脆入面軟綿綿，不喜歡吃南瓜嘅Mcmug都覺得好吃，好快就食晒。我對於套餐嘅甜品通常冇咩期望，但係依個布甸真係有啲驚喜，我覺得佢係有用心制作，無論係餐湯或者甜品，都嘗試喺傳統扒房嘅框架下作出新嘅嘗試，冇故步自封，我覺得這一點很值得讚賞！
Mcmug後記：冷氣太凍，🐽皮好厚嘅我坐到最尾都打晒冷震，亦都因為冷氣太凍，啲野食好快凍；鵝肝/甜品算係幾高質，其餘嘅食物都算係正常水平；配菜都有啲fusion感，咁大個仔第一次食扒餐嘅配菜竟然係條菜芯，花園餐廳/大家樂都冇咁有創意。
正氣嘅晚餐，令人微笑，有機會會再黎，期待下次嘅配菜係我最愛嘅油麥菜😗😂
