德國餐廳 (Mikiki)

營業中

休息中

朋友知我鍾意食德國豬手同埋飲德國啤酒，於是就捉我黎呢一間德國餐廳食晚飯，老老實實，新蒲崗都真係有啲偏僻，就算有咗新屯馬線都唔係踩正新蒲崗，不過朋友一番心意就梗係要去試一試啦。呢間德國餐廳好似係連鎖店，好耐以前試過大角咀嗰間，味道正常啦，可惜今次幫襯嘅呢一間就真係有啲失望。德國豬手同德國啤酒就必點啦，不過多口問下個侍應邊隻德國啤好飲，佢竟然叫我飲藍妹，即時O咀，原來所謂德國餐廳嘅侍應竟不知道藍妹唔係德國啤，心諗呢間野係咪轉左手所以亂黎，講真，飲藍妹我是但去個大排檔都得啦。野食就好一般，個豬手嘅皮唔夠脆(似返叮感覺)，無叫其他野，真心失望，唔算難食，不過唔值咁嘅價錢啦。