滷友記 (華都中心)

營業中

休息中

平日不時都會經過呢間「滷友記」，其店面光鮮，店內以大地色為主，布置簡單，望落乾淨舒服，但由於價錢同附近餐廳比相對無咁吸引，所以一直遲遲未試。小店提供的食物都以滷水野為主，但仍有少許炸物，不過一心打算淺嘗，所以同朋友只點左一個飯同撈麵。牛筋、金錢肚、新竹貢丸配滷水汁撈粗 $43一直都係撈粗愛好者，所以二話不說點左個撈麵；滷水汁較稀，所以掛麵能力唔高，但好處係入口唔會太鹹，而且滷水味幾香。牛筋炆到仍然彈牙，有咬口；金錢肚都好味，但切得太幼，少左煙韌口感；貢丸完全唔得，太淋太粉。牛三寶飯(金錢展、牛筋、金錢肚) $52夾左朋友一塊牛展黎試，估唔到肉質鬆化，一D都唔乾唔韌，配埋個滷水汁，好有驚喜!!凍檸茶 $7唔係即沖，而係預先沖好放係雪櫃入面，檸檬已經浸左好耐，苦澀味好重。呢度有兩款辣醬，一款有蒜香，好友話好味，但我就比較中意呢款好有麻香而辣度又唔算高既麻辣醬油加落撈麵度就成為最近大熱既台式麻辣撈麵!!~整體食物味道唔錯，滷水汁唔係好油、好杰、好濃烈果款，而係較稀、入口唔會好油膩、但都好香既款式。偶然想食滷水野，都可以再黎試。