漁川米線 (沙咀道)

營業中

休息中

港式早餐變化唔大，有時小小變化已經好滿足。好難講健康，以現代人嘅飲食文化，真正健康嘅嘢食完會覺得空虛，就算再健康都會加小小唔健康嘅成份，令到你入到口。依間米線係有營食肆，湯底無加味精，亦有營養推介，以前都有推介過我食開嘅款式，而今次會講早餐。同一般港式餐廳一樣，三文治、奄列，多士唔會少，麵食都有配唔同嘅肉，亦有公仔麵，但湯底係魚湯，而且好多款都配蕃茄，感覺夠為健康。留意一般早市麵餐款式少，套餐更唔係雪菜就炸菜肉絲，最多有仿鮑片，再來多士加隻蛋，份量樣樣少少，變化又少。而依度餐牌雖然加價多過變化，但勝在本身配搭已比好多地方多，份量足，想食多啲加幾蚊可加配，腸仔/火腿/餐肉配煎蛋同牛油方包，即係平時早餐過份，價錢同出面差唔多，但個麵就升級咗，雖然早市個湯底比較淡，但性價比仍較高，對好食魚嘅嚟講，確實係唔錯選擇。每朝要來杯咖啡嘅，佢哋係即磨意大利咖啡，雖然係咖啡機冲，但質素唔會太差，留意附近分店除座位外，款式都有小小唔同，首次食建議望望餐牌先。