九份•十分 (已結業)

今日去完朋友屋企玩，咁岩係上水，就決定一齊食埋個晚餐。經過彩園廣場，行下行下見到間好特別既台灣餐廳「九份·十分」，睇下menu見幾岩食就決定試一試！入到去職員好有禮貌咁帶位，見呢排天氣凍又準備暖水比客人，真係好窩心！餐廳裝修都幾特別，配合返台灣既特色，有好多名信片既裝飾掛牆，而且座位都幾舒服！Menu都有好多選擇，我地叫左個半筋半肉牛肉麵，牛肉麵有得揀粗/幼，我地揀左粗麵。湯底都幾濃，有少少辣，牛肉份量都幾多，幾抵食！鹽酥雞都係必食的，餐廳預備左8重口味既調味粉係到比你自己落，任由你選擇！鹽酥雞新鮮炸起，好脆口，而我自己就鐘意芝士口味，絕配！哈哈！之後仲叫左個蚵仔泡飯，蚵仔好新鮮好肥美，一啲腥味都冇，除左蚵仔仲有蜆係入面，湯好鮮甜，難怪差不多每一枱食客都有叫！值得一試！最後緊係唔少得甜品，叫左個士多啤梨窩夫，由於係即叫即製，所以可能要等耐少少！嘩，一上枱，比佢個貌相吸引住，睇得出好比心機整，窩夫熱辣辣好脆口，配埋士多啤梨味雪糕同士多啤梨，簡直有冰火既感覺😂今餐食得好開心，值得再試！