真鮨 (已結業)

晚飯時間想搵好嘢食，路過見到呢間餐廳嘅餐牌都算 OK，就入去坐低喇。店內裝修色調好和諧，閣樓式嘅設計，地方細，不過都坐得都幾舒服。雖然客人唔多，但落單後等嘅時間都幾長⋯⋯第一道上桌嘅係軟殻蟹卷，炸出嚟嘅蟹唔係幾有味，而且真係好軟，配搭嘅沙律菜味道都有少少怪怪地。心想：今次可能又中伏啦 不過中伏之念好快扭轉咗。落單時侍應講明係韓國膽而唔係加拿大膽，但都十分鮮味。為咗每口飯都有海膽，我地決定 撈勻嚟食，啖啖都有海膽味。值得一讚嘅係除咗主角，呢間舖嘅配角都做得好好，溏心蛋食落好甜，酸薑片亦都十分夠味。就喺個海膽丼食完之際，師傅砌咗好耐嘅壽司盛終於都出場——一共十二款壽司，質素當然唔係完美，蝦同帶子都唔夠新鮮；不過其他都第一件食嘅係左口魚，十分夠味；吞拿魚看似很瘦，但食落有驚喜；鰻魚、三文魚都十分肥美，尤其三文魚，油脂溶喺口入面嘅感覺實在難以形容，不過亦十分易滯；玉子亦都十分甜，其他質素亦算不俗。整體而言，雖然等上菜嘅時間長，但整體食物質素算為中上，值得幫襯。侍應們亦十分勤快，會主動加茶。不過廁所感覺就爭啲。