廚魔茶室

營業中

休息中

主理人係餐飲業界知名人物，自然吸引得多人一試究竟，睇到唔同評論各走極端，決定咗要嚟試。餐廳環境、外觀、內裏裝修，都凸顯出主理人就係呢間餐廳嘅最大賣點。同意其他食評家所述，店員服務態度係優先需要處理一項；姐姐還好、男仔嘅態度真係不敢恭維。焗豬扒飯 - 飯底本身已經係一個招倈，有香氣嘅蛋炒飯做底，已經唔係好多間餐廳嘅焗豬可以做到。比較遜色嘅係除咗芝士同蕃茄肉/醬，冇其他嘅配料伴菜，食落有啲寡。豬扒係夠腍，但用嘅部位都係偏向肥膩，食完成個飯已經接近食唔落其他嘢。蝦多士條 - 表面有櫻花蝦咗點綴，但其實對味道冇乜太大幫助。蝦味同麵包融為一體，兩者平衡程度剛好。明明落單揀咗蕃茜千島醬，但最終係俾咗蜜糖芥末，醬汁係大路嘅味道，冇乜特別。凍奶茶 - 正常發揮，茶味夠，甜度稍弱而不夠回甘效果，但老實說已好過好多其他茶餐廳。梳乎厘西多 - 外觀好睇但過份油膩，切落去嘅時候不停有油咇出嚟😅 食落外表鬆軟，內裏同一般西多士無異。的確係幾有特色，但並唔係必須要試。總括而言，呢間算係一間值得嚟試嘅茶餐廳，食物質素係交到茶記應有水準。