要留得住食客嘅胃，秘訣好簡單，就係抵食同好食，而堅信號就冇因為上咗軌道而大幅加價，價錢仍然非常親民大眾化，所以就算而家疫情下嘅午市時間，餐廳內都不乏顧客捧場。
生煎包係佢嘅招牌菜式，每次嚟到都必食，佢嘅生煎包真係夠晒正宗，同我第一次喺上海食到嘅一樣，底部香脆而不硬，咬開嘅時候係有爆汁嘅效果。我就覺得比起某間米芝蓮推介餐廳正宗好味得多。
皮蛋豆腐好滑，切成薄片，上面再加上皮蛋同雪菜，淋上醬汁，凍凍地好好味。
食過前菜後，就食午市套餐，一份主菜加小食連飲品都只係$53起，份量仲好多，真係好抵食。
堅信號秘製厚切豬扒真係好厚身，肥瘦適中，煎香後再搽蜜糖，食落甜甜地，配埋菜飯真係冇得彈！
雞絲粉皮薄而滑，上面有雞絲青瓜仲加咗麻醬，係一道非常好味嘅開胃小食。
另外仲叫咗個四川擔擔麵套餐，今次揀咗京汁茄子做小食。
擔擔麵嘅湯底非常濃郁，帶微微的辣，麵質相對地較林身，同出面一般擔擔麵感覺唔同。
京汁茄子係一個涼拌，佢嘅京汁甜甜地，加咗雪菜絲，非常惹味，如果夏天食就更加正喇！
雖然已經飽飽地，不過仍然意猶未盡，最後都叫咗個紅油炒手。紅油抄手總共有六粒，辣油非常香並帶少少辣，加埋蔥花，作為一個小食，份量剛剛好！
為食嘅我哋叫咗咁多小食，埋單每位都唔使$100，真係超值到不得了！
