丼家 (已結業)

今日元朗行完山搵食，不到七點黎到丼家，好好彩有位，小店座位不多，遲黎就要等啦，而店員亦都想客如輪轉，食剩少少已經想收碟，我地都識做，食完都盡快閃人。三色丼$98有帆立貝、甜蝦、吞拿魚，三樣野味道普通，吞拿魚較軟身，口感一般，或者同放題質素差不多，勝在賣相放得靚靚，飯本身有醋調味過，幾好食，飯量多，加$18轉定食，麵豉湯似自家製，味道幾好，沙律菜就一般，雜果係罐頭，綠色果個小食就不錯。蟹籽蟹肉沙律$48: 蟹肉係幾鮮味既，青瓜絲爽口，蟹籽脆口，加埋又幾好食。芝心軟殻蟹卷$78: 有四件，每件大大份，有蟹柳、蟹膏，軟殻蟹大件又脆，但芝心味道就唔明顯，反而芝士粉芝味較重。杯茶都好好飲，望一望茶包，似有唔同物料在內，味道似有麥香，有層次。總括：價錢平又大件抵食，元朗壽司店一貫作風，不過就唔算正宗啦。