湄江 (已結業)

上星期五我o地幾個老友為3姑預祝生日，挑選了十幾間餐廳供她選擇，最後揀了這間。我都舉手贊成，因為早前食過，無論環境同食物都唔錯。當日其中一個老友親手整了一個蛋榚，但當請個侍應暫時雪起個蛋榚時，佢話要每人收50蚊切餅費，我就話其他餐廳都免收的，侍應就話咩餐廳呀，麥記定大家樂呀?態度好串，最後佢問過經理都話可以免收。不過大家都唔鐘意佢d態度。今次叫d 菜色與上次完全不同：大蝦柚子沙律及馬拉盞炒通菜–係大路貨色，沒有特別驚喜。牛肉香蕉蕾沙律-本來我o地係叫炸軟殼蟹香蕉蕾沙律，唔怪得食唔到軟殼蟹，只食到一塊塊好似牛肉的物體，再問先知原來落錯單，o黎o左牛肉，不過味道幾特別，酸酸地。青咖哩雞-咖哩味道好淡，而d雞又有雪味。青椒燴羊肉-將d羊肉爙入完隻青椒裡，不過又爙唔晒，搞到椒尖沒有羊肉，而羊肉味唔羶，口感好似係牛肉，而且又唔嫩。龍蝦仔剌身-本來想叫酸辣生河蝦，因為冇貨，所以先至叫龍蝦仔，唔係好掂，一d新甜味都冇，龍蝦肉又唔爽，有少少霉霉地。炸蝦餅-係全晚至掂，一睇色澤已知係新鮮炸起，食落熱辣又脆口，不過蝦味欠奉。一如我以往經驗，再食第二次，肯定冇第一次咁好。下次我都唔會介紹d朋友o黎。