顏府御膳 (已結業)

今日來到銅記Cubus的『顏府御膳』，呢度環境優雅寧靜，非一般中式酒樓的氣氛，好適合情侶談談情，拍拍拖，而且一路有浪漫柔情英文歌聽，例如『fly me to the moon 』等歌曲，呢個時候你又會有高級餐廳食西餐的感覺，但其實我哋食嘅係中餐。先來個涼菜『胡麻茄子』，賣相極討好，但唔講真係睇唔出係茄子，軟硬相宜，有小小食日式菜感覺。『海皇酸辣湯』有蝦肉，魚肉，木耳絲…酸辣中有海鮮，我鍾意吖。『砂窩涼瓜豉蒜炆頭腩』上枱時熱辣辣，吱吱響，就知係惹味菜式，切碎咗嘅豆豉更入味，涼瓜軟腍腍，吸收了頭腩精華，零舍好味。『荷香蟲草花銀耳蒸雞』蟲草花極多，舖满成個蒸籠，蒸雞『滑沥沥』，仲有陣陣荷葉之香味，正。『醬油安格斯牛崧炒飯』可以用心去感受安格斯牛的油香，炒飯炒得好均匀，唔錯。