嚐仙 (已結業)

見近排好多人推介，夜晚食完飯同fd特登嚟試下，因為我哋都好鍾意食芋圓。排隊排咗20分鐘，先落單俾錢後入座。我哋分別叫咗雙芋鮮奶凍加薏仁同埋芋圓紅豆湯。呢碗雙芋仙草奶凍加薏仁（$49） — 首先份量問題，賣相唔差以為好多好滿，其實個碗比較細，更驚訝既係下面仲墊咗層冰，d冰完全無味道，「糖水」都唔甜無味道，感覺店家無誠意又唔老實。芋圓口感ok，得果幾粒尤顯珍貴，不過無乜香味囉。芋泥同珍珠味道正常。d仙草本身味道唔差，但份量太少（因為下面有一大舊都係冰）而「糖水」無味，順帶一提個奶都係無味，變左清水浸仙草... 再加埋d水汪汪既薏仁，講真$49你食埋我嗰份。呢碗芋圓紅豆湯裡面有芋圓+小丸子+珍珠，d珍珠同小丸子咬落都係淋嘅，一d都唔煙韌，小丸子真係好難食，好似食緊麵粉漿咁，咬咗一粒即刻吐咗出嚟，食唔落🤢 我碗嘢得3種料，2種都係難食嘅，即係我齋食芋圓加d好稀嘅紅豆湯就$45，都係嗰句，你食埋我嗰份。總括而言，我明白喺尖沙咀區店家既價錢唔能夠同台灣比，但味道做唔好，份量方面又取巧搵笨，真係非常唔推薦，唔會再幫襯。