首先要讚嘅係店鋪地理位置一流 離佐敦地鐵站只有2-3分鐘腳程
第二要讚嘅就係店面走黑色型格風😎而入面都同樣由內型到外
既有型格bar枱 又有文青風木系櫈 cool下又得 斯文又得
而呢度亦唔止有串燒食 午市仲有提供西日fusion料理
今次個胃未有quota試盡 留待下次encore～
Mizu串燒omakase套餐（$288）
包括：2道前菜、5串串燒、主食以及一杯飲品
串燒分別係秘製雞肉棒棒、一骨手羽先、新鮮白鱔、
安格斯牛小排以及日本青椒仔
首推秘製雞肉棒棒😍 醬汁調味一流 沾上生雞蛋一同食用 簡直完美💯
二推新鮮白鱔 外皮煎得香脆 燒過嘅白鱔去除了腥味
平時少食魚嘅我都覺得好食😋
主食係燒明太子飯團（跟茶漬湯）
職員介紹有三種食法：就咁食、沾生雞蛋食、放入湯食
生雞蛋係剛才用嚟食秘製雞肉棒棒嘅 估唔到又可以用嚟伴飯團🍙
身為蛋控嘅我就最鐘意沾生雞蛋食🥚
而放入茶漬湯食亦有另一番風味 清淡得嚟又舒服
杏仁咖啡（跟餐＋$0）
咖啡有淡淡杏仁香 口感亦更順滑 味道更上一層樓
日式豆腐燒（$38）
細細聲 我一早睇中咗呢度嘅豆腐燒！我朋友聽到都笑一聲
點知真係好好味喎🤤🤤豆腐外皮炸得脆口 豆腐口感幼滑
燒梅子飯團（跟茶漬湯）（$48）
同樣有三種食法 唯飯團放入茶漬湯之後 梅子味幾乎消失
所以一定要有部分飯團係就咁食 先可以嘗盡其滋味
