火鳳凰火鍋料理 (已結業)

今晚同3個朋友加埋一個小朋友黎呢度打邊爐，雖然餐廳地點唔係旺角最熱鬧嗰啲位，但好近旺角火車站同唔難搵，而且呢邊少啲人, 比較易泊車。餐廳入面既地方都好大，我鍾意佢啲位夠闊，而且枱同枱中間都有野間開，每一張枱都有自己既空間，喺餐廳入面仲有2間房，最大嗰間分開2邊, 一邊係大枱可以打邊爐，另一邊好似客廳咁有梳化同枱，想一班人包一間房食飯傾偈就最啱。佢係用QR code落單，晚飯時間竟然仲可以order點心，不過我地無叫。4個人其實都叫左10幾樣野。我覺得佢全部野都好新鮮。而且啲肉同海鮮仲用食用花同金泊黎裝飾，食都食得開心啲。因為有朋友想要清啲既湯底，但又有朋友唔食芫茜，我地最後叫左皮蛋馬蹄芫茜湯底，但芫茜可以另上，呢個都係餐廳貼心既地方。另外覺得個響鈴係必食。落單嗰陣以為係平時嗰啲。但黎到就有啲驚喜。首先個響鈴好大盤，而且睇得出係自己炸，仲要上面加左好多木魚絲，侍應姐姐話就咁食都得，真係好好味!