稻香 (已結業)

話說星期六帶塐土小朋友去朋友屋企，朋友家住九龍灣，夜晚大家係度諗咁多人又有位嘅餐廳唔多，只有酒樓可以易搵位d，所以我地決定搵酒樓食晚飯，但突然打邊爐條引跳起，就提出想打邊爐，見mega box 嘅酒樓應該冇咁多人易搵位就決定去啦。mega box 嘅酒樓做婚宴居多，可以打邊爐嘅只得2間，上次已經試左河鮮啦今次就食稻香。其實去食之前個心已經做哂心理準備，因為稻香唔係任食打邊爐所以埋單應該較貴但好味，但打電話訂位時職員話任食168蚊一個大人，我地都十分意外又怕係自己聽錯，明明上稻香個網站睇都只係得宵夜任食（我地訂左7點食）。入到去估唔到係真係有任食，仲要有好多款式有d出正任食仲冇架，例如九肚魚，蠔，沙白蜆等，仲要質素唔差。肥牛黎講又幾好，唔會話太肥或太瘦。不過我地食得太開心同太快我完全唔記得影火鍋料。湯底我地有2個，一個係芫茜皮蛋湯比小朋友食嘅。另一個係肉骨茶牛雜湯我見到肉骨茶已經二話不說揀左佢，但就唔係我諗嘅個種有藥材味嘅肉骨茶，不過入面好多料好多牛雜。飲品方面有呢d涼茶，汽水同果汁沙冰。涼茶都幾足料，另外有雪糕杯同中式糖水。真係估唔到呢間稻香有任食呢，168又真係好抵。