銀杏館-越老 (已結業)

咁岩係油麻地學野，朋友隨手係openrice搵到呢間越南菜，餐廳名好貼合主題：越老，支持長者繼續工作！講真第一次去到平安大廈嗰門口到，真係諗左一諗有冇行錯，有少少恐怖。不過上到餐廳門口，發覺係另一個世界。啲裝修好有feel，又有live唱歌。環境唔錯，好岩傾計。坐左一陣仲full house。本來諗住社企餐廳食物會一般般，點知估佢唔到嘅好味喎。因為我同朋友都想食light啲，所以就叫咗沙律系列。燒牛肉木瓜沙律賣樣吸引，好大份。嗰dressing勁開胃，帶微酸，青木瓜好新鮮，勁爽口。燒牛肉夠入味，不過用係肥牛，食落有少少油，如果改左係用香茅牛肉應該會正好多。不過好在青木瓜沙律夠青新，減低油膩感。手撕雞椰菜沙律好多越式餐廳嘅沙律都會用同一個dressing。不過呢個係唔同㗎，同青木瓜沙律嗰汁好唔同，不過同樣好開胃，嗰汁好夾椰菜嘅味道，不錯。最後食米紙卷呢個同我去越南食嘅味道係一樣㗎，雖然價錢差好多😂我地最後清哂碟，埋單二百幾蚊，好食，環境不錯，服務又好，所以食完係開心滿足嘅！