Rainbow Bistro (已結業)

本來喺附近食日本嘢，點知啲位俾人訂晒要坐吧枱位，但太陽曬住好熱所以就轉地方！🥺之前經過幾次見呢間好似唔錯，見午餐牌有鍾意食嘅釀雞胸，滿心歡喜即刻就入去。前菜係沙律或者是日餐湯，今日係粟米忌廉湯我揀咗湯，嘢飲揀咗免費嘅凍茉莉花綠茶，食物好快上枱，個湯不過不失正正常常，嘢飲一個淡字冇乜味，主菜跟住嚟咗賣相幾靚，薯條炸得唔錯，不過雞胸…..切開試咗一個字非常失望，雞胸肉好難整到滑就預咗，但裏面係完全冇味，蘑菇夾住嗰啲位就有少少味，但蘑菇同芝士本身都好少、完全食唔到芝士味咁滯，問佢有冇黃芥辣佢就話冇，唔明點解西餐廳會冇？同佢反映佢就話俾啲鹽我，本身飲湯問佢攞咗黑胡椒，所以我話唔使，我落咗黑胡椒但都係冇味，最終淨係食咗少少夾住蘑菇同芝士嘅肉，跟住真係食唔落，非常失望埋單走人，埋單嘅時候再同佢講啲雞肉冇味，不過佢都係冇出聲，服務態度唔係太差，但係出品有問題客人同你反映你都冇正視諗住處理，依間餐廳發展空間有限。