滾喜火鍋專門店 (已結業)

朋友知我係牛魔王&蠔王，就帶咗我去位於旺角女人街內一間叫「滾喜火鍋專門店」到打邊爐，佢話我應該會鍾意，講到咁堅就緊係要去試吓啦！入到店內，職員安排座位後好快速咁拎咗個醬料架過黎比我地自配醬料。而我地就揀咗$278任食，因為睇相嘅牛肉感覺係靚D，而且桶蠔係任食。湯底我地就選擇咗番茄湯，其實我都係第一次用番茄湯底黎哋打邊爐，估唔到都好濃蕃茄味。先上咗肥牛、黑毛豬、滑雞三樣，肥牛望落色澤好靚，忍唔住成碟即刻放哂落去，烚幾秒夾返上黎，食落好重牛味！黑毛豬就唔覺特別，但滑雞出奇地好味，超滑！而另外仲有自家製雲吞&水餃，雲吞內嘅蝦好爽口彈牙；水餃內有芹菜，對我黎講就麻麻，無咗芹菜就好了。另一重點桶蠔登場，size 比起食開嘅桶蠔就細咗D，但相比日本廣島蠔嘅Size就大少少，味道都OK，所以Encore再Encore...P. S. 其實都想為班職員平反，當晚我地食嘅時候，佢地嘅服務又唔似之前嘅人講到咁差喎！反應快又有禮貌&笑容，喺旺角食野有咁嘅服務水平，好過好多咪豬年評級嘅餐廳啦！