Starry Night (已結業)

自從出現疫情之後，我都好少出街食飯，喺網上面見到呢間餐廳，可以任食生蠔，就即管嚟試吓啦。首先講吓餐廳嘅裝修，佢唔似一般傳統嘅餐廳，反而似一個私人派對房間，當中有好多玩酒game嘅設施，間格好鬆動。首先一嚟到我哋就叫上一打生蠔，除咗生蠔之外，碟上面仲有海螺，鮮蝦等等，望落去都好新鮮。佢哋上菜嘅方法好靚，有一個類似火山嘅物體，入邊放咗啲乾冰，放咗生蠔喺上面之後，啲煙係入邊漂出嚟，視覺嘅享受一流，未食已經感覺到餐廳好有誠意。啲生蠔唔似出邊嘅飲食餐廳咁樣，又細粒，又放咗好耐，呢度啲生蠔隻隻都好大隻，好肥美，而且係咬落去好多juicy !!!你可以望住師傅喺你隔離開生蠔，每一隻都好吸引。最重要係可以任食，而且每次都唔會慳住慳住，大大碟咁樣上。套餐另外有主菜，跟住我哋再叫咗一個牛扒，同埋羊架，食完生蠔已經有啲飽，但係牛扒同羊架真係好好食，食得出廚師嘅功力，啱啱好整到外面熟，裏面多肉汁，而且羊架用嘅應該係羊仔，食得出啲肉好嫩滑。臨走前，我哋再叫多咗半打生蠔，老細見我哋咁鍾意食，特登揀咗幾隻最肥美嘅俾我哋，淡淡都係肉，好creamy，真係值回票價！誠意推薦比大家！