本場

營業中

休息中

又到咗燒肉時間🔥今次去咗旺角新開業嘅本場食燒肉放題。呢度環境幾大，而且裝修幾有日本味，坐得都算舒服😌• 極上牛小排海鮮放題(星期一至四) $378/位呢個等級嘅放題有成137樣食物可以揀，選擇超多！同大部分燒肉放題店嘅做法一樣，都係會先上一個燒肉拼盤，擺盤我覺得可以放得整齊少少，同埋如果可以落返啲Label標示返唔同嘅部位會清晰啲🤔咁呢個放題以牛小排為名，我哋當然主攻牛小排，佢嘅油份好豐富，所以食落都特別香口，另外個人建議可以配埋月見汁一齊食，甜甜哋嘅燒汁同蛋汁撈埋有種食緊壽喜燒嘅錯覺！至於第二個重點就係海鮮喇，牛油廣島蠔同蝦仁我都幾推介，事關個牛油汁真係幾香🙆🏻‍♀️除咗燒肉仲有啲冷盤、小食同主食，不過我哋就淨係試咗少少😛。明太子蕃茄上有滿滿嘅明太子醬，啱晒明太子控！芝士年糕新鮮炸起，炸皮輕薄。甜品較特別嘅有榴槤麻糬，內饀嘅榴槤味濃到不得了，可惜個皮唔煙韌真係失色咗啲，唔介意口感嘅係值得一試嘅，另外仲有每人一個Movenpick雪糕☺️