相聚一刻 (已結業)

疫情放緩之後，就開始陸續約返啲朋友見吓面，今日就約咗一個中同去到位於界限街嘅相聚一刻，顧名思義，我哋嘅目的就係要相聚一刻。餐廳嘅裏裏外外都充滿霓虹光管，甚有氣氛。中同話呢度嘅生蠔好抵食，如果鍾意食生蠔嘅話，可以揀1.5小時任食，佢話佢有個朋友可以一口氣食咗三打半😅，即係唔使$8/隻😱。不過我哋就想試吓其他食物，所以就叫咗半打生蠔淺嘗一下。見佢可以做任食生蠔，以為都係細細隻嗰類，原來佢嘅size都絕不欺場，而且每隻都好肥美飽滿，味道就偏淡，啱晒我嘅口味。唧少少檸檬汁，再配埋佢哋自家製嘅Cocktail汁，真係別有一番風味。食生蠔當然係配白酒，整返兩杯先配合返呢度相聚一刻嘅主題。食過生蠔之後，就要食返啲熱食，呢個北海道帶子鮮茄意粉用新鮮蕃茄製成，非常惹味。大大粒嘅北海道帶子唔會煮得過熟，配埋新鮮蕃茄味道真係非常唔錯。另外我哋就選擇咗海鮮雜燴飯，其實佢係一個意大利飯，而且充滿濃濃嘅芝士味道。配有大大隻嘅青口，混埋入意大利飯入面真係幾好味。海鮮仲包括有一隻隻嘅墨魚仔，每隻都爽口彈牙，令人越食越開胃。