The Galley by Cafe Proud Wings (已結業)

已經好耐冇去過機場，好耐冇飛過，今晚book咗酒店，決定扮去旅行過週末。去旅行要搭飛機，今日我打算去食飛機餐，唔係國泰航空外賣比大嶼山嗰啲，而係停泊響大角咀嘅飛機。餐廳外面環境已經係一架飛機咁樣，門口仲有登機牌。見到已經覺得好興奮，OK，我知咁樣好白痴，但我好耐冇去旅行，真係好想去。今晚訂位都好滿，我上唔到飛機呀，淨係可以去登機大堂咋。老實講，呢啲裝修裝到俾人打卡咁嘅餐廳，我對佢哋嘅食物一啲期望都冇！但係就有好大驚喜。一個人去食唔到好多嘢，我只叫咗蟹餅同埋白酒大蜆意粉。蟹餅做得相當唔錯，唯一係我覺得可以做得實少少，但調味非常好。至於個大蜆意粉更加不得了。顯好大隻、肥美，調味好適中，而且意粉仲可以選擇手工意粉！手工意粉的確係唔同啲。如果一早預訂坐飛機位，仲可以攞到呢張登機證。難得嘅係呢度裝修靚、好玩、而且食物質素高。食完一餐飯嗰種滿足感仲可以持續落去。食完飯行過廟街，我好肯定咁同自己講：呢度係歌舞伎町。