巴辣仔烤魚雞煲 (加連威老道) (已結業)

好耐冇食雞煲火鍋，今次同同事一齊嚟食，佢話有朋友介紹此新分店，近我哋公司，所以收工後一齊嚟食。對上一次食雞煲火鍋已經超過四年，上一次感覺麻麻，所以一路都冇再食雞煲火鍋，但經過今次之後，對雞煲火鍋有啲改觀，有機會都可以再嚟食。叫咗半隻巴辣鮮雞煲，佢哋旁邊放咗個漏斗計時，隻雞應該好大隻，雖然話半隻雞都覺得好似好多，雞肉嫩滑新鮮，放齊所有雞嘅部位，確保原隻雞斬半，唔會好鹹，辣度剛剛好，好嘢味。食咗八九成雞肉後放湯轉打邊爐，每種材料份量都幾多，最後都清唔晒枱面上所有材料；鮮蝦雲吞蝦肉結實彈牙，大大隻材料豐富。墨汁墨魚丸亦有墨魚鮮味。廣島蠔都用咗高質素嘅蠔，就算滾得耐啲都唔會縮細好多，蠔味十足。蝦滑擺設精美，上面放咗啲蝦子，煮熟之後都冇甩到，蝦肉新鮮。最有質素就鮮滑牛肉，果然又新鮮又嫩滑，少咗超過8分鐘都唔會覺得韌或老，滑嫩依然。