食鐵板燒，識揀就一定揀坐BAR枱，一邊享受食物，一邊欣賞師傅既表演，我地係早一個月前BOOK枱架
其實小店有唔少熟客仔黎過再返兜，我坐左係度近2個鐘，有七八成都係熟客
希望之後出名左唔好太難BOOK枱啦
臨近聖誕，小店推出左聖誕MENU，不過我地都覺得食開果個套餐抵食又岩口味，所以照舊叫左個----鐵板限定套餐(二人前) $798+1
蟹捧沙律
呢個沙律係用醋做醬汁，非常醒胃，係一個唔錯既前菜
活魚奶麵鼓湯
由於我一向都討厭飲呢款湯，所以無試到
但見到入面有唔少材料，有豆腐、海帶、蜆肉，而且蜆肉SIZE都唔細架~
雜錦刺身 (三文魚、甜蝦、八爪魚、北寄貝)
雖然三文魚同甜蝦未叫鮮甜，但可接受；反而平時我唔中意食既八爪魚同北寄貝就幾爽口同有海鮮味
鐵板配菜及蒲燒鰻魚
鰻魚色澤非常靚!!
閃閃發光~ 鰻魚無骨且肥美，魚油同醬油香混合一齊 正~唯一缺點係醬多左D，鹹左少少
翠肉瓜同冬菇都好好味，又嫩又多汁
日本黑毛豬
我記得上一次食呢個黑毛豬係超驚喜，因為第一次食粉紅色既豬而且仲要好JUICY又唔韌；但今次既黑毛豬就遜色左，比較韌同鞋
黃金老虎大蝦
呢個係全場最好食、最邪惡既食物!!
大蝦用猛火煎熟，可以速迅鎖住蝦汁，令蝦肉食落彈牙、重蝦味；再配上個邪惡黃金醬，由蝦膏、牛油、芝士整成，蝦膏味濃郁!!
真係食到LamLam脷
美國頂級牛柳
師傅為左可以更快將牛柳表面煎熟，會表演一場”猛火燒牛柳”，全場火光紅紅
在旁既小朋友睇得甚高興~
牛柳五成熟，非常JUICY~
其實唔點任何醬料就咁食已經好正；重口味既話就可以點炸蒜，不過個人覺得蒜味太重，蓋過左牛本身既味
牛肉黃金炒飯
偏肥既牛肉粒一直放係鐵板邊燒到出油，之後再用佢既”牛油”炒飯，所以有咩可能個飯唔香唔好食先得架!?
白飯炒到粒粒分明、沾滿”牛油”同豉油，好夠鍋氣無論幾飽都要食佢!!
日式炒時菜
時菜由銀芽、椰菜、甘筍絲組成，不過落鹽落多左，鹹得制
甜品 – 芝麻雪糕/雞蛋布甸
雖然雞蛋布甸好滑好動”L”，但芝麻雪糕既芝麻味較濃，似真材實料既黑芝麻製成，唔係香精製造
總體食物質素好，職員有禮貎又友善，會主動同客人傾計，了解佢地既需要。一間咁有Heart既食店，我一定會再黎~
