傷心酸辣粉 (已結業)

尋日我失戀，突然有興致去旺角食一碗傷心酸辣粉，係我人生中第一碗！我晏晝1點幾去，可能係星期六啦，所以都幾多人，但我都係等左十分鐘就有位，唉，一個人去係易d有位既......碗麵上面鋪上大量肉醬、蔥花、花生，十分惹味，一食落口，d粉感覺好滑溜，好多油，之後辣味直攻上鼻同眼，我真係辣到喊，酸同辣既層次好豐富，互相襯托，好正呀！另外，我嗌左牛腩，肉質細嫩，吸收左腩汁同碗粉既湯汁，令佢有肉味又有辣味，好！佢既口水雞都值得一試，我之前去四川食過正宗既口水雞，而佢整得冇正宗既咁麻，反而佢都幾夠辣，好爽！最後埋單百幾蚊，如果兩個人去食就岩岩好，可惜我甩左拖！