旺角MOKO嘅Aburi-EN，主打日本炙燒丼同宮崎和牛，店內裝修乾淨企理，木色系枱凳配日系吊燈。
一本鰻魚三吃上，賣相好有氣勢，一整條鰻魚鋪滿白飯，鰻魚燒到外皮微脆、內裡好冧又Juicy，蒲燒醬帶住淡淡甜味，同飯一齊食好惹味。 第一吃就係原味鰻魚飯，感受鰻魚本身嘅鮮甜同炭香；第二吃加蔥花、山葵同紫菜撈勻，加日式味粉，味道層次好豐富；第三吃再淋上清爽出汁，變成茶漬飯，鰻魚同米飯吸滿湯汁，好暖胃又好好味。
輕燒宮崎和牛三吃用上連續攞獎嘅宮崎牛，油脂分佈均勻，炙燒到面頭略帶焦香，入口即溶，嫩滑又啖啖肉。 用溫泉蛋撈飯，更凸顯到和牛肉嘅香濃。
輕燒宮崎和牛鰻魚三吃，係和牛同鰻魚一次過上場，牛肉嫩滑、鰻魚鮮甜，一啖牛一啖魚，味道層次更加豐富。 可以先試純牛純鰻，再將兩樣夾埋加配料一齊食，最後加湯做成茶漬飯，整碗飯由頭到尾都好惹味。
小食厚炸沖繩島豆腐外脆內嫩，咬開仲保持到豆香，同海鹽一齊食幾惹味。
沖繩風炸豬肉芋蓉餅外層香脆，內裡綿密帶豬肉香，口感由脆轉軟。
凍熱情果檸檬茶酸甜清爽，解膩解渴。
香檸蝶豆花梳打，顏色由深藍慢慢變成帶紫色，好夢幻又好啱影相打卡。
