1
餐牌包羅萬有，甜食有啫喱雪糕，餡蜜，雪山，芭菲，布丁，蕨餅，年糕甜湯，白玉甜湯，芝士蛋糕，卷蛋，另外亦有鹹食如蕎麥麵，烏冬，稻庭麵，鰻魚飯，牛肉丼，其他定食等。茶有日本最好嘅抹茶玉露，焙茶，玄米茶，煎茶，紅茶，黑豆茶，沙冰，牛奶等。餐牌寫每人最低消費一樣野，用餐時間普通座位為90分鐘。
香港限定芭菲 $98 另加一
之前已經食過呢款香港限定芭菲兩次，我次次都要食。香港限定芭菲一貫用高身玻璃杯裝住，有好多層嘅材料。首先抹茶軟雪糕喺頂，香濃厚身抹茶味濃而超滑溜，下面有三粒有嚼勁嘅白玉丸子同三件好滑嘅抹茶蕨餅。呢度嘅蕨餅係我暫時喺香港食過最好味嘅。下底就係我鍾意可以加添口感嘅脆米，再下底就係抹茶嘅絕配紅豆蓉，不過我覺得太甜。仲有少許忌廉，同兩粒浸泡過嘅士多啤梨。再下底就係啫喱同抹茶蕨餅。最下底一粒白玉丸子就完成成個香港限定芭菲。當然呢個香港限定芭菲口感勁豐富，集香滑，香脆，滑溜，煙韌，鮮甜於一身。不過今次食完我覺得太甜，已經係同人分享左。
雪山 $108 另加一
特大雪山有勁多軟綿綿嘅雪花冰，外面嗰層已經加左牛奶，味道微甜，味道調得好啱。入面好多雪花冰係冇味，等你自己加另上嘅抹茶醬或者煉奶食。抹茶醬好香濃而煉奶好滑，各有各好。
雪花冰傍邊有兩粒白玉丸子，
下底仲收埋左唔少抹茶蕨餅同紅豆蓉，今次同無味既雪花冰一齊食就唔覺甜。上面最頂有半球抹茶硬雪糕，雖然唔係軟雪糕，但係都好滑同抹茶味香濃，配綿綿冰食都幾好。不過，個人覺得之前喺Ocio食過嘅雪山冰幫你調好味仲抵食啲
。
黑糖珍珠焙茶雪糕 $58 另加一
呢款黑糖珍珠焙茶雪糕係期間限定，即刻試吓先。焙茶雪糕好香濃厚身同超滑溜，正，個人覺得仲好食過抹茶味。杯邊超多黑糖珍珠，超煙韌好有咬口但唔過甜。雪糕下底原來仲有脆米加添口感。不過仲有一小pat忌廉我就唔太欣賞，太膩同冇必要。
平日4點入座唔洗等，座位正常。食物質素有保證，招牌抹茶雪糕同焙茶雪糕無令人失望。其他配料如抹茶蕨餅，黑糖珍珠同白玉丸子等都好好。不過服務就好一般，我哋坐普通座位明明限時90分鐘服務員又話60分鐘。明顯細過5歲嘅小朋友又提你要叫野俾佢，但餐牌寫明5歲小朋友唔計。話哂都收加一服務費架嘛。要改善改善。勉强比個笑臉啦
。
