滿屋廚房 (已結業)

好耐冇嚟過愉景新城啦，最近去咗親子餐廳Fullhouse Kitchen食晚飯，強烈推薦。除咗環境適合帶小朋友嚟之外，我覺得都好啱三五知己嚟食飯，因為好抵食，樣樣都係幾十蚊兼大大份！點咗小食沙嗲雞串(6串），雞肉燒得剛剛好，完全唔乾，沙嗲醬仲有少少花生碎嘅口感，好惹味！開頭以為呢間係西餐廳，點知都好多東南亞菜式，見到連喇沙同海南雞飯都有得食。點咗海南雞飯，雖然雞肉份量唔多，但勝在肉質嫩滑，完全唔嚡，而且唔會太鹹或者太油膩。雞皮薄薄一片，咬落微微帶爽脆。醬料有齊三款，黑豉油、辣椒醬同薑蓉。辣椒醬酸辣醒胃，蘸少少更加吊味。唯一需要改善嘅地方係雞飯無咩雞油，我嫌太過健康呢。見到蛋糕櫃嘅西餅好精美，我哋就點咗一件柚子蜂蜜卷蛋試下，估唔到好好好好食！！！！呢款係季節限定，蛋糕好鬆軟，食落有清爽滋潤嘅柚子蜂蜜嘅香甜味，味道好清新。入面嘅cream亦好輕盈，好有水準，$22我覺得都抵食呀。