木玥巷

營業中

休息中

無得去旅行，又掛住台灣，唯有食吓台灣菜頂吓癮先，近日喺屯門井財街附近發現一間隱世嘅台式餐廳，主廚少傑原來曾經喺嘉麟樓做咗15年，辭職前已經做到二鑊位置，主廚做慣五星級酒店，餐廳選材都有番咁上下水準，例如用到美國安格斯牛肉嚟做一個台灣牛肉麵、歐洲鰻魚嚟做鰻魚飯等。餐廳裝潢以木系為主調，播住台灣歌，燈光柔和，有偌大窗戶透入陽光，座位闊落舒適。台灣雙色腸，雙色腸上枱十分吸引，橙色嗰隻係經典嘅台灣腸，味道同喺台灣食到嘅一模一樣；黑色嗰隻係墨魚汁台灣腸，除咗有墨魚嘅香味之外，裏頭真係有一粒粒嘅墨魚喺條腸入面，認真真材實料。黑糖蘋果西打豬軟骨飯，豬軟骨味道酸甜得嚟好有層次， 木玥巷嘅軟骨唔似得坊間一般餐廳咁炆得咁腍，我反而鍾意佢呢度嘅新穎口感，好似食緊雞軟骨咁卜卜脆，旁邊嘅小菜小碟有青瓜紫洋葱同埋椰菜絲，酸酸地都幾開胃。白桃桂花烏龍清茶， 見餐廳嘅餐牌上面寫住無糖同埋推介即刻忍唔住嗌咗一堆嚟試下， 烏龍茶茶味極龍， 趁住香濃嘅桂花尾同埋淡淡嘅白桃味， 果然唔使落糖都有夠好飲。離開嘅時候門口已經有好多人等緊位，想食好西嘅朋友就要早啲到喇。