臨家麵館

營業中

休息中

之前食過荃灣大壩街嗰間唔錯，原來荃灣街市街近熊貓酒店都有一間。紅酸湯崩沙腩台南扁粉（$68）凍檸檬茶（$0）上次無試紅酸湯呢款湯底，今轉唔使諗就嗌嚟試。湯底同預期中一樣偏向重酸味，個人口味唔太合適。崩沙腩有四舊，標明「新鮮本地牛腩」，有肉有筋膜，有牛肉味，可惜肉質唔軟嫩稍稍偏嚡。台南扁粉即係幼身河粉，口感滑身唔糊口。配菜有三款菇、豬肉碎、旺菜絲、芫茜蔥，反而好欣賞啲配菜，味道不錯又份量多。蕃茄濃湯虎皮鳳爪扁麵（$51）凍阿華田（$0）蕃茄濃湯酸酸甜甜，加埋蕃茄件及蕃茄蓉，呢款湯底啱口味啲。虎皮鳳爪有三隻，夠腍。扁麵麵條有咬口，麵質較紮實。配菜同樣有三款菇、豬肉碎、旺菜絲、芫茜蔥。下午茶時段，送凍熱飲品。「臨家」三款湯底試哂，每款都不錯，但如要排先後，個人認為蕃茄濃湯 > 沙茶湯 > 紅酸湯。