一坐低例牌先拎野飲，哩度嘅野飲雖然唔算特別多，不過勝在唔洗加錢都有得任飲啤酒，連加士伯都有，啱晒麻甩佬，每人隊佢幾罐都回返本。
未食火鍋之前，我地先食住點心，點心有十二款，賣相雖然冇連鎖茶樓咁精緻，不過卜道都唔差，最抵讚係佢可以逐件落單，唔怕食唔晒一籠。
東哥蝦餃皇 & 鮮蝦菜苗餃 - 兩款餃餃皮唔會太厚，仲帶啲彈性，入面蝦嘅比例都正常，唔會唔霉。
鮮人參灌湯餃 - 雖然而家嘅所謂灌湯餃其實都係浸湯餃，不過大隻得黎塊皮又唔會好厚，而且都真係食倒有人參，算係咁。
鮮竹牛肉球 & 蟹籽燒賣皇 - 可以逐粒叫，唔怕有人唔食浪費，牛肉球同燒賣唔會太粉，味道正常。
沙律蝦春卷 - 春卷一樣可以逐條落單，脆得黎唔會太硬。
湯皇鮮竹卷 - 鮮竹卷一份有三舊，入面有魚肚、芋頭同蟹柳，都幾飽肚。
流沙擂沙球 - 擂沙球出面係煎堆，脆得黎唔會太油，入面嘅芝麻餡雖然唔係好流沙，不過就好香芝麻味，必食！
千層紅棗糕 - 紅棗糕煙煙韌韌唔會太甜，食得出紅棗香味，味道唔錯。
澳門豬骨煲 - 食完點心，我地就打邊爐。因為一來想留肚食點心，二來唔想食完雞煲個煲好油就咁加湯打邊爐，所以我地就冇點雞煲，淨係打邊爐。如果唔食雞煲，可以有四款唔同湯底揀，我地揀左豬骨煲，入面有幾大舊豬骨同粟米，都幾足料。
墨魚滑 - 火鍋料方面，除左墨魚滑每枱只有一條，其他都可以任食。墨魚滑食落幾彈牙幾香墨魚味。
任食火鍋料雖然唔算好多款，不過豬牛雞、丸、海鮮、豆品同蔬菜都有。其中海鮮方面，扇貝同廣島蠔雖然係急凍貨，不過上枱時已經完全解凍，加上唔會太細隻都有睇頭，都算係咁。
鮮脆魚腩 ＆ 鮮脆鯇片 - 兩者之中我比較鍾意脆魚腩，因為比較厚肉同肉質比較結實有咬口。
其他火鍋料都係正常任食質素，肉類方面我比較鍾意肩胛牛肉同豚肉，前者脂肪比較平均，後者口感幾滑。
炸魚皮 ＆ 響鈴 - 魚皮脆得黎唔會太硬，縉鈴就比較薄身，浸一浸就好，否則太腍。
松葉蟹柳 ＆ 鮮柏葉 - 蟹柳係粗身嗰款，啖啖肉。柏葉好爽口唔會韌，唔錯。
娃娃菜 - 非常爽甜。
總結，點心比打邊爐好食，雖然火鍋料都係普通放題質素，但扇貝廣島蠔同脆魚腩都有得任食，最正係可以啤酒任飲，啱晒酒鬼。
