選擇都算幾多，全部都係日本直送嘅和牛，有唔同部位加唔同嘅醬汁，花多眼亂之下決定都係揀個二人餐，個餐都幾抵，4款牛 2款雞 再加海鮮，另外3款菜。
ఌ和牛
和牛赤身 和牛腹柳小排 牛舌
赤身脂肪比例比較小，比較有咬口，雖然係比較瘦但一啲都唔韌，另外佢仲預先用燒汁調味，令佢更加吸引。小排比較重油份，入口比較嫩。
ఌ 雞
有兩款雞肉，只係簡單用蔥同鹽嚟調味，雞髀肉同雞胸，當然前者就正好多，後者比較有雞味。
ఌ 大蝦
海鮮有兩隻大蝦，應該係赤蝦嚟嘅。肉質好爽，而且好大隻，平香咁樣拎去燒吓，已經好好食。
ఌ黑毛和牛西冷 大判燒！
望到Menu已經想嗌，單點一件都要$175。職員就話，可以隨時搵佢幫手燒，加分加分！
兩邊輕輕燒到僅僅熟，再加隻半熟蛋，小小嘅調味，全塊牛肉質超肥美，入口即溶好軟滑。加埋隻蛋就好似壽喜燒咁 有驚喜啵！
ఌ前菜 沙律 冷麵
套餐仲包咗泡菜3味，最鍾意食都係白蘿蔔 食到全口油，可以食返啲泡菜嚟宗和一下。
唔使驚唔夠飽，仲包咗一碗冷麵，冷麵酸酸辣辣，留返最尾食都幾開胃，面質唔錯都幾彈。值得一讚嘅係，留返最尾食碗麵都冇發脹。
ఌ甜品
最後仲有一份甜品，係杏仁奶凍同埋雪糕糯米糍。但係用和盒裝住，已經夠靚啦。本身麻麻哋杏仁味，不過奶凍都係滑同好易入口。糯米糍煙韌韌，絕對唔係求求其其嘅貨色。
總括嚟講，套餐比較抵食，單點嘅話呢價錢係貴嘅，不過都係值嘅。單點大判燒，都175，全個餐一人份量都唔過500，計返其實係幾抵食
