古早味澎湖台灣 (已結業)

呢間野呢排成為我既午餐熱點，本身都冇乜特別野想講，味道一向唔錯，牛筋牛肉麵直情係賣飛佛，湯底濃厚五香味。勾起我寫食評衝動既，竟然係發現店內有一樣野，係好唔掂既。話說我同男友諗住食好啲，就點左價錢比較貴既「魚穫飯」，一齊諗住試下新野，開心下。點知。個魚穫飯賣相已大失所望，唔靚唔在講，料少，大大舊炸粉擋住視線了，足足4大件。一舊仔魚塊，一隻炸蝦，一細截台灣腸，一啲菜。就承惠78蚊。咁炸粉究竟係咩？哇！係魷魚酥，仲係發育不良添。基本上，我好難相信有任何一個人可以食得落一件，全舊係無味炸粉團。條酥幼到睇唔到時，舊粉竟然神奇地包到咁厚。今日係咪休魚期，魚穫零仃到咁既地步，其實我地係唔醒既，應該問下佢今日有咩魚穫先落單嘛。其實我係鍾意食入面既其他野，午餐牌入面都冇野唔鍾意食，仲有+8蚊轉芝士奶蓋真係好抵。下次唔會再叫呢個飯，都提一提大家問清楚咩料先點菜喇。