泰金國 (已搬遷) 新店位置

星期五夜晚九點幾，二人行去到泰金國都仲要等位真係旺場！二人行叫左三份小食，一份主食，埋單260幾蚊，九龍城泰國菜正常價錢，唔係特別平。燒豬頸肉燒得非常香口，肥瘦相間，有嚼口又唔會韌。一碟份量唔少，大大細細加埋都有十幾廿舊。抵食！炸蝦餅新鮮滾熱辣上碟，配搭甜甜酸酸嘅甜辣醬，香口得來又好好食。不過略嫌有啲熱氣，食咗兩舊之後連牙肉都痛埋不過蝦餅入邊主要好多魚肉膠，反而蝦味欠奉。泰式碎豬肉包生菜，啲豬肉好辣，可能係我唔食得辣啦。同行有人就食得好過癮啦，鋪頭提供嘅生菜都唔少，有時有啲鋪頭比生菜得嗰幾塊，如果要加生菜仲要俾錢。呢度就唔使啦生菜多到我可以用來就咁食成晚唯一比較失色啲嘅就係炒金邊粉，雖然炒得好香口，但係味道略嫌有啲唔夠，淡茂茂。值得一提嘅係我見隔離枱帶咗個燒牛肉，睇起上嚟非常好食，下次如果有機會嘅話我一定會叫黎試下！提醒！呢度係唔俾加單架，所以如果要嗌嘢食要一次過嗌哂！