一入門口見到掛起左一堆韓國傳統服飾，後來發現有小朋友著住韓服走入餐廳，當時太忙食野唔記得問職員，但我諗係門前既韓服應該係特登掛出黎俾客人免費著住黎食海鮮鍋既
第一次去九重鮮，餐廳俾我既第一印象係環境企理乾淨，侍應有禮貌，服務亦十分周到。黃埔店有位叫蔡經理既呀哥，佢親力親為走哂全場同各枱食客介紹蒸鍋。我婆婆有咩問題都會叫我等蔡經理行過個陣問下佢 XD
好！講番個蒸鍋，我地食個個係新推出既珍寶蟹餐，經理話新到連menu都未印出黎 XD
經理話個鍋係行蒸氣既，用我地統稱既環保水令成個鍋越滾越出味。侍應係一開始就將我地揀好既人參雞粥底放入鍋底，然後蓋上隔層板覆蓋住，一直蒸煮鍋粥。
首先出場既第一層係單層遞上既前菜 - 和牛九節盤。五顏六色包括中間既紅菜頭汁蘿蔔片（用黎包住配料）、主角和牛片、甜蛋、青瓜、紅黃椒、蔥絲、菇等等，作為前菜幾精緻特別，味道爽甜，如果加上紫菜絲就更有韓國風味。小朋友老人家特別中意等食主菜個陣有d細藝，我婆婆包得好開心！蔡經理話呢道前菜又叫做秘密花園。
之後侍應再放多三層，叫我地等十分鐘就可以揭開食。
第二層係濟洲豚肉，侍應教我地將豚肉夾泡菜食。肉片切得薄所以好快熟，彈牙好食！
第三層為魚板花膠串，蔡經理話構思緊幫佢起多個韓國電視劇名做天國的階梯，因為塊魚板串起上黎似樓梯。花膠好爽滑，我中意佢本身冇咩調味夠清，配上大大塊魚板就有微鹹，岩岩好！
第四層鮮味就係大主角加拿大珍寶蟹！蟹蓋既蟹膏係撈埋左蛋一齊去蒸，有少少海水味好滑好好食！呢一層食左好耐，因為大家都慢慢剝蟹，啖啖肉我媽媽至愛😍
食哂咁多層，侍應再拎多四層過黎，鍋蓋頂插上左溫度計，當時85度，侍應教我地等到溫度升至95度就可以開始食😋
第五層係蔬菜盛盤，俾我地食完花膠同珍寶蟹之後消一消化。我最中意既係芝士水滴 （流心芝士餡魚蛋）同野菜豆腐。有四隻大蝦，好鮮甜！
第六層係我最中意既日本大元貝，超級超級超級鮮甜，誠意推介大家一定要將元貝作為其中一層！平時食開粉絲蒸元貝食得多，通常都俾炸蒜頭同其他野蓋哂元貝本身既味道，但大大隻就咁蒸真係比我想像中鮮甜！我可以食兩打都唔厭！
第七層，蔡經理叫佢做意外驚喜。有幾驚喜？ 呢層米紙龍蝦湯海鮮卷用埋越南既米紙卷fusion海鮮放入蒸鍋蒸，好似去左酒樓食一盅兩件咁趣緻。我覺得米紙卷好足料，食得出真係用厚厚既米漿做，入面有小切蝦同魷魚粒，仲加左菇粒令口感更爽口。
第八層既主角係黃金福袋配甜番薯同甜南瓜，黃金福袋做得好好，入面又係我至愛既流心芝士，番薯同南瓜切片好甜好味道😋
到最後出場既第九層 - 人參雞粥！人參雞入面釀左糯米，外面係珍珠米。食左成個半鐘，之前每一層既海鮮既汁都流哂落最底層鍋底既粥入面，個粥好正好鮮味，吸收哂所有精華！特別推薦鍋底揀人參雞！
以下係帳單同餐牌以供參考：
