九份•十分 (T Town ) (已結業)

見網友激讚呢一間九份十分，一直都想同媽咪嚟試好耐，今日卒之有機會喇。Oreo曲奇珍珠奶茶，奶茶嘅茶香同朱古力味相當平衡，溫馨提示飲唔到好甜嘅朋友記得嗌微糖啊。老皮嫩肉，老皮嫩肉即係鹵水豆腐，不過呢一隻豆腐個口感非常特別，外層濃香嘅鹵水味底下係煙煙靭靭嘅豆腐，個感覺有少少似魚腐，但係要比起魚腐嚟得更煙靭，係非常之特別嘅一道。古早醉雞，醉雞酒味十分濃厚，雞肉亦都十分嫩滑，最估佢唔到嘅係連雲耳同埋杞子都有雞味同酒味㗎。鹽酥雞排肉燥飯，呢度嘅雞排同埋肉燥簡直同我喺台灣夜市食到嘅一模一樣，雞排酥脆少油，皮下脂肪唔多，肉燥味道香濃，送飯一流。芭樂鳳梨鹽水雞干伴麵，喺香港鹽水雞唔同鹽酥，唔係間間台式餐廳都食得到，鹽水嘅鹹香加埋鮮甜嘅芭樂同埋鳳梨認真一絕，攞埋個鹽水雞汁嚟撈麵，相得益彰。香蕉芝麻雪糕鬆餅，食到差唔多尾聲就好開始嗌呢類鬆餅類甜品，因為呢度嘅鬆餅係即叫即製架，製作需時大約15分鐘，即整嘅鬆餅果然好味好多，上枱嘅時候仲係熱辣辣脆卜卜，一啖溫熱嘅鬆餅，再一啖冰凍嘅雪糕，就係食呢個甜品嘅最高境界喇。