翡翠拉麵小籠包 (已結業)

拉麵(麵)同小籠包真係好好食，呢到咁多人講過都唔講咁多喇蘿蔔絲酥餅都好，但係出面唔少舖都有同樣水準。今日見天氣有少少熱，叫多左個冷麵，有冬菰絲係度，幾好，不過都幾辣，麻醬味適中，唔會太濃，如果濃得滯就會「漏」。如果冇咁辣會仲好。今次叫左蜜汁雙火方，比出面食o既多左塊腐皮，但覺得有D多此一舉，係脆左，但係唔係好夾味，賣得都幾貴，$60得三件，洞庭樓都係$15件，北京人家更只係$10左右。仲叫左個蔥油大餅，但應該叫大餅蔥油囉，根本主次不分，D蔥油太多，個餅淨係得出面個少少麵粉包住，你估整小籠包咩，蔥油餅更係要多麵粉先好食架嘛，而家係食餅，唔係食蔥油呀，仲要賣$40，真係唔抵。仲有個荷香粉肉卷，唔係太特別，有糯米雞的感覺，唔係好食得出裏面有乜野，但都係$40得2件。但呢度地方好迫夾，兼且要搭檯，仲要飲「阿公茶」，服務同環境就真係要扣好多分喇。