丸和食堂 (已結業)

不時要到港、九、新界做嘢，每每收工差不多係晚飯時間，所以都會早少少响附近食埋，今日去到上水都唔例外，行過門口睇吓餐牌，好似唔錯，就入去試試啦。呢度6:00剛剛開門無咩人，店內乾淨企理，仲有樓上，坐位都幾多。揀坐卡位坐得舒服啲，店員勤快送來熱茶。大家都唔肚餓，叫啲小食先。日式炸嫩雞 $38大大件雞肉，表面香脆，嫩滑有肉汁，點埋辣辣哋嘅醬汁，更添風味。紫心香芋丸$28新鮮即炸熱辣辣，外皮香脆，內裡芋蓉香甜，好正！橫濱芝士竹輪魚卷$42，竹輪魚卷表面脆脆哋，裡面係流心芝士，幾過癮。炙燒芝士大蝦反卷$62，好大堆頭有8件咁多，每件有大量蟹籽响面，大蝦鬆脆熱呼呼，抵食之選。傾吓飲吓，又叫多個飯，蒲燒三文魚腩燒汁飯 $68四大件燒三文魚腩，肉質肥美嫩滑，配埋燒汁惹味又好送飯。柚子梳打$18，柚子蜜加梳打水，消暑之選。宇治抹茶鮮奶$28奶味香中透出抹茶香，入口舒服，解渴。