安安燒 (染布房街) (已結業)

今日約左同事放工後一齊食晚飯，因為天氣開始轉涼，大家都希望食火鍋或者食串燒去迎接涼快天氣，最後預約左旺角的安安燒。慶幸一早預約了6人座位，否則晚上6人食飯真的很難搵位，可能要等好耐先能夠入座。串燒主要調味為孜然粉及七味辣粉，如果唔食得辣的朋友就要落單前同侍應講走辣或少辣會比較好。飲品方面種類有好多，汽水、啤酒、生啤等等都有供應。食物方面有素菜類、丸類、肉類及海鮮類，款式都有很多可以供給食客選擇。個人比較喜歡食燒娃娃菜同燒韮菜，而喜歡食金菇的朋友必定要點叫蒜蓉牛油焗金菇，惹味可口，食到整個口腔充滿住蒜蓉牛油的香味，滿佈油香。仲有燒栗米，燒起來唔會太乾身，粟米汁依然保留得到。丸類推介當然係要叫蜜糖燒燒賣同燒墨魚丸，燒燒賣係非常之好味，基本上每次去燒烤都會食燒燒賣，配搭埋蜜糖真係無懈可擊。墨魚丸方面，我就略嫌辣味蓋過墨魚丸，如果走辣轉蜜糖燒的話，我相信效果會更好。最值得推介係海鮮類，價錢雖然比其他食物較高，但係食落就覺得係超值。蟶子皇非常大隻，配上蒜蓉蔥花辣椒，仍然能夠釋出蟶子鮮味，而唔會俾配菜搶走鮮味。另外仲有鮑魚、扇貝、燒蠔同燒鱔等等任君選擇。