新泰東南亞餐廳 (太子集團中心) (已結業)

喺open rice揾到間泰國嘢，喺尖沙咀，見到啲圖片覺得唔錯，於是約個朋友去食下啦。入到去個裝修唔錯，我哋星期二晚去的，七點半去到間餐廳，差唔多已經全場滿座啦。我哋點咗燒虎蝦，燒黃鱔，虎蝦一碟有兩隻，嚟到果然有驚喜，好大隻同埋好多蒜蓉啊。另外點左串燒，個串燒裏邊有雞牛豬，每樣兩串，噉我覺得呢個係必食嘅，嗰串燒即刻燒出嚟，熱辣辣好香口，配埋串燒醬比我地，正呀。另外仲叫咗個炒金邊粉，同埋印度酥餅，個金邊粉酸酸甜甜咁，唔錯架。印度酥餅就好有口感。我個朋友點左個芒果沙冰，個沙冰好重芒果味啊，比較香甜，值得一試。我哋點嘅食物，已經足夠三個人食架啦，埋單都係500蚊左右啦，即係每人百多元，但係已經食到虎蝦，黃鱔，豬牛雞串燒，所以我覺得呢間野係相當抵食。