在太子工作完, 順便約朋友晚飯, 經過見到呢間餐廳門面很中式, 以為食中菜, 點知原來食西餐, 有趣丫.
時間尚早所以人流少, 不用等位就直接入座. 裝潢幾特別, 又中又西.
有中國風格的掛牌, 懷舊美女海報.
又有西式酒吧牆身, 釘皮梳化, 還有中國風格的窗之裝飾.
也少不了有傳統紅燈籠裝潢.
餐廳主要有CAFE的食物, 意粉/小食/PIZZA/ 沙律, 仲有鬆餅/蛋糕/甜品, 除了特飲之外, 仲有Cocktail等等.
我同友人一邊食一邊傾計, 可以消磨一晚了.
公雞碗就見得多, 公雞碟真係少見, 特別配上西式餐具, 感覺幾特別. 準備開餐啦.
藍莓紫薯五穀拿鐵 $48, 紫薯味幾濃, 反而冇咩藍莓味, 但就有好重的穀類味道的特飲, 味道不錯.
芒果熱情果沙冰$50, 相對地, 我叫的沙冰比較好飲, 芒果香甜又濃郁, 熱情果微微酸味, 沙冰仲打得好幼滑, 整杯飲品都夠凍又唔太甜.
煙三文魚凱撒沙律 $78, 沙律菜好新鮮爽口, 沒有爛葉. 煙三文魚大約有3-4塊, 肥美鮮嫩.
凱撒沙律醬加了酸瓜粒好開胃, 但就跟平時的凱撒醬不同, 反而有點似由普通沙律醬調出來.
而且沒有芝士碎及脆麵包粒, 感覺總是欠了點東西.
水牛城雞翼 $68, 一客有5隻, 下單後即炸, 所以夠哂熱辣辣, 皮脆肉嫩已經好好味, 一咬雞翼好多肉汁, 要小心熱傷.
反而個醬汁冇我預期甘好, 不夠酸也不夠辣, 好溫和的沙律醬調出來, 而且醬汁較少.
珍寶帶子墨汁意粉 $108, 超級香, 一上菜就傳來陣陣蒜香, 墨汁意粉用大量的蒜來調味, 加上很掛汁, 每口都有忌廉醬汁的香味.
意粉軟硬度適中沒什麼特別, 墨汁味也不算好重. 反而有大大粒的珍寶帶子, 煮得梗梗熟, 又嫩滑又彈牙. 份量偏細幾岩女仔食.
紫薯草莓鬆餅配抹茶雪糕 $88, 雪糕可以自選原味或抹茶味.
鬆餅好脆身, 內裡有好多紫薯蓉, 好健康. 加上質感鬆軟唔會太乾身. 自選的抹茶雪糕都有抹茶茶甘, 只係偏奶味重, 整體的抹茶味道合格.
呢款甜品好滿意, 除了賣相好看,味道都好好, 食完都唔覺甜膩.
