Yaki Biru (已結業)

收九點半，跑落大角咀博文街食，找來找去，就揀咗yuki buri居酒屋。店仔細細，20多個座位，可能太夜，只有十個八個年輕人傾吓偈。我揀居酒屋，因我覺得食品會精緻啲，質素會高啲，不過呢⋯⋯今次係例外。叫咗雪泡麒麟、冷烏冬、燒牛舌心、燒扇貝、什錦天婦羅。首先，雪泡麒麟無雪泡，真係可以去海關舉報。由於女侍應好有禮貌，我無反枱，仲好奇地問，點解唔對辦嘅？得到的答案，係部雪泡機可以調較，較大啲可出雪泡，但由於會「轟轟」聲，所以就調細了，調細了，咪無雪泡效果囉。。。靚女侍應的確有有效平抑顧客的負面情緒～其二是冷烏冬，不過係浸咗响室温的汁中。我寧願他俾一小碗冷汁我，好過一大碗室温汁中，加上味道平平無奇，真係不要試。什錦天婦羅，58蚊貨仔，我覺得都炸得唔錯，係剛炸的，無油益味，兩隻蝦、兩粒冬菇、兩條秋葵。敗筆在於個完全無味的天婦羅汁，由於個汁可有可無，我就不要求有蘿蔔泥了。至於串燒牛舌心及扇貝，串燒係唯一合格的製作，希望能保持水平，不至於滿盤皆落索。