Tulsi & Wine (已結業)

星期六同老婆去左上環嘅海味街買鹹魚，諗住夜晚返歸整餐鹹魚肉片煲仔飯撐枱腳，點知行下行下、買下買下就太陽落山了，老婆又話行到好攰唔想煮飯，於是叫我同佢去西環般咸道上次食過嗰間羅勒餐廳食晚飯。跟住就放左條鹹魚喺我背囊，費事去到餐廳俾人投訴就唔好啦。我地倆口子喺上環搭一個站港鐵去西營盤再行路去般咸道，喺餐廳門口等左五分鐘就有位了，於是坐低點左兩個set dinner，有tomato lobster rissoto同 spaghetti carbonara ，仲有生菜沙律同餐湯。前菜沙律同餐湯味道尚可，不過不失。到主菜出場，個蕃茄龍蝦意大利飯未食已聞到濃濃嘅蕃茄味，飯面擺放左一隻拆了殼的龍蝦鉗來增加賣相，未食已經流哂口水，飯粒煮得洽到好處，中間有少少煙韌，香濃嘅醬汁包住飯面，我同老婆食到顆粒不剩。而佢地嘅白汁雞蛋煙肉意粉係我好鐘意食嘅意粉之一，牛油、煙肉、芝士、洋蔥一齊煮，非常之香，面頭仲加埋隻生雞蛋等你撈勻嚟食，簡直係色香味俱全，但醫生建議我唔好食太多高脂肪同膽固醇嘅食物，所以當晚好節制，冇食埋老婆果份。嚟過呢間餐廳幾次，食物水準仍然保持到，喺香港呢個"先聲奪人，尾聲失魂"（一開始就好食，後