泰園 (已結業)

今日同同事放工後飯聚，大家午餐嘅時候都分別提出大家想去既餐廳，其中一位提出去尖沙咀嘅泰園，話有好多特別嘅菜式，好多都係佢哋獨有，講到咁勁，就去呢間。地點都算好方便，係尖沙咀地鐵站行3分鐘就到，店舖裝修就真係唔似泰菜餐廳，不過勝在坐得舒服。泰式刺身拼盤，呢個真係未試過，有原條活立魚，聖子，帶子。日本刺身做法，配三種特別嘅泰式醬汁，味道好特別，可以用酸辣帶出鮮味。原條活立魚好新鮮，肉質爽口。聖子，帶子，配其中綠色嘅醬汁就最夾。獅蚶，好地道嘅泰菜小食，清潔得好乾淨，可能因為健康問題，煮得好似熟咗少少，走咗一D獅蚶嘅鮮甜味道。泰式生蝦，用新鮮海蝦，相對比較爽口，咬落有口感D！泰式生醃蟹，嘩嘩，呢個係香港真係未試過，用三點蟹醃製，好重魚露味，夾埋D生蒜一齊食，味道都幾鮮甜，無腥味，值得一試！海南雞配波波油飯，海南雞都算嫩滑，油飯整成波波，大家朋友一齊分享都幾方便，油飯味道都香濃，合格！泰園嘅泰菜確實同出面嘅好唔同，好期待下次再嚟，佢哋又有D咩新菜式呢。