海港酒家 (已結業)

平安夜前夕，除咗係情侶睇燈飾嘅好日子，亦係毒拎聚會嘅好日子。一行3人，一於去大埔新達廣場嘅海港酒家食個下午茶賀一賀佢。燒賣：賣相好差，啲燒賣扁晒塌晒，好似有人食過咁。味道比賣相好，蝦夠爽脆，豬肉味濃郁，但係有啲乾身。雞扎：廢青救星，唔少朋友話，食雞扎嘅原因係唔駛lun骨就食到雞。讚一讚佢，成個雞扎都好挺身，證明好足料。咬入口，嘗到煙韌嘅腐竹，冬菇嘅鮮味，充滿湯汁嘅魚肚火腿同埋雞件，美中不足嘅係雞油味唔夠濃郁，雞扎嘅「雞」味唔見太突出，毒拎會有啲失望。鳳爪排骨飯：廢得嚟又唔怕lun骨嘅可以試下。飯有玫瑰露嘅香味，帶出蒸飯嘅米香，大讚。排骨夠滑，而且蒸得啱啱好，排骨好juicy。鳳爪呢就有啲霉，質感好爛，唔太好。蝦餃：賣相麻麻，蒸得有啲過火導致蝦餃塌下，蝦餃皮變得透明。味道方面，蝦夠爽脆，但略嫌乾身。潮州粉果：賣相唔錯，但可能蒸得太耐，所以令到d皮比較淋身，肉類同埋蔬菜嘅比例平衡，但係略嫌較淡。叉燒腸粉：無咩特別，不過不失。鹹水角：0分重作！！！～先唔講味道，上枱嘅時候，啲咸水角係凍嘅！！係寒冷嘅平安夜前夕，毒拎走去飲茶無非都只係想感受到聖誕節少少暖意。對呢件事，毒拎表示極之憤怒同埋遺憾。