食美軒 (已結業)

早兩年疫情關係，唔敢約朋友食飯，近日疫情放緩，約了好久沒見的朋友食飯。最喜歡由地頭蟲帶路食好野，唔洗自己諗又有信心保證。朋友今次帶我食蟹宴，抓緊秋天的尾巴。呢間食肆位置在何文田，但其實好近旺角，旺角站行過來都唔洗10分鐘。呢度環境好古色古香，有好多街坊幫襯，差不多滿座，見到店員都好忙碌。我地叫左「金秋蟹宴」套餐，有5道菜，相信好夠食。酥炸蟹皇蓋 - 金黃色的蟹蓋好飽滿，裡面有蟹肉以及雜菇，外脆內軟。蟹粉小籠包 - 一定要趁熱食，一啖擺落口，滿口都是湯汁，仲食到滑滑的蟹粉，好滿足。雪𥚃藏龍 - 係蛋白裡藏了蝦，蛋白好滑，味道比較清淡。如果想濃味少少，可以加埋紫蘇葉一齊食，啲紫蘇葉都炸到好香脆。蟹粉豆苗 - 呢碟好大碟，豆苗加埋蟹肉蟹粉原來都好夾。臘味煲仔飯 - 剛剛開始入冬，正是時候食煲仔飯，有好多臘味，臘腸、潤腸、臘肉、臘鴨都有齊，個人最鍾意潤腸。煲仔飯啲豉油好香，加左豉油成個煲仔飯即刻昇華了。見到其他檯啲野食都好吸引好香，有機會下次再聚再食其他野啦。