安哥食館 (已結業)

安哥食館黎過幾次，每次都冇令我失望，想係市區食大排檔就會諗起佢。金牌咕嚕肉 ($98)好記得第一次食呢個咕嚕肉時驚為天人，從未食過有醬汁仲可以酥脆如朱古力片既脆皮，唔厚粉得黎神奇在攤凍左都仲脆。 半肥瘦豬肉咬落有肉汁，甜酸醬汁味道溫和，僅僅夠包住每一舊肉。超欣賞伴碟有開胃爽脆蕎頭，每次都冇人同我爭可以獨食，同炒既彩椒熟度亦岩岩好。 印象中上次食到既肉瘦少少，雖然都唔算油膩，但如果用軟腍既瘦肉就完美喇。生炒糯米飯 ($98)粒粒分明既糯米飯炒得好靚，冇加入老抽染色，食到淡淡清爽既豉油香，足料滿佈臘味同蔥粒，我食左半碟。潮式蠔餅 ($88)即叫即炸，蠔仔夠新鮮大粒啖啖肉，外層香口鬆脆唔會太咸，點埋魚露岩岩好。 可能食開加左鴨蛋既炸漿，略嫌呢度欠缺左少少香氣，中間既部分亦比較厚粉，兩個人食有少少吃力呀。 可惜椒鹽九肚魚已經售罄，相信會滿足好多。裝修唔算好靚，但光猛乾淨，經常見街坊一家大細黎擺幾圍，氣氛幾熱鬧。 不過位置唔近地鐵站，有少少難搵呀。