肉餅哥小炒料理 (已結業)

難得同老公可以一齊係平日放假，見到甘多人呢排都係南豐紗廠打卡，我地就去扮下文青去朝下聖。去之前搵個地方食個飯先，老公就預先睇中左呢到嘅肉餅夠多款選擇，雖然離地鐵站都有一段距離，都要行過嚟食醫肚。可能就嚟落場，餐廳得幾個客，一坐低，餐牌都未睇，店員就已經攞左2碗老火湯俾我地飲。係青紅蘿蔔湯，幾清甜，飲落唔覺有好多味精呀。我選擇左流心芝士肉餅。肉餅煎得幾香脆，除左肉餅面上面有塊火炙左嘅芝士外，肉餅中間有真正嘅流心芝士。整體味道不錯，略嫌肉餅溫度只係暖，唔係熱辣辣。老公就選擇左金沙煎肉餅，一層咸蛋黃醬淋係肉餅上面，仲有半粒咸蛋黃添，貌相更加吸睛。咸蛋黃醬好濃郁，令肉餅整體昇華左，送飯簡直一流呀！雖然我係芝士愛好者，但不得不投金沙肉餅一票好食呀！除左白飯之外，仲可以加2蚊轉雞油飯或者菜飯，我地2個不約而同選左菜飯，好似健康啲，仲加左5蚊要多碟油菜。